Hún segir frá atviki sem hafði djúpstæð áhrif á hana, þegar hún gekk í burtu frá hlutverki eftir að hún taldi leikstjóra hafa farið yfir mörk hennar.
Chopra skaust upp á stjörnuhimininn þegar hún var valin Ungfrú Heimur árið 2000. Hún byrjaði að leika í Bollywood myndum og naut góðs gengis þar. Hún segir frá því þegar hún fékk hlutverk í ónefndri kvikmynd en hún hafði aldrei unnið með umræddum leikstjóra áður.
„Þetta hefur verið um 2002 eða 2003,“ segir hún.
„Karakterinn minn var leynilögga, ég átti að draga mann á tálar, augljóslega er það sem konur gera þegar þær eru leynilöggur. En ég var að draga manninn á tálar og átti að fjarlægja eina flík í einu. Ég vildi fara þá í margar flíkur en leikstjórinn sagði: „Nei, við þurfum að sjá nærfötin hennar. Af hverju annars ætti einhver að vilja horfa á þessa mynd?“
Hann sagði þetta ekki við mig. Hann sagði þetta við stílistann fyrir framan mig. Þetta var svo niðurlægjandi.“
Chopra segir að hún hafi unnið í tvo daga eftir þetta en síðan ákveðið að hætta. Hún fékk aðstoð frá föður sínum heitnum, Ashok Chopra, við að borga framleiðendum myndarinnar til baka það sem hafði verið eytt í tökur.
„Ég bara gat ekki horft á hann á hverjum degi,“ segir hún en nefnir leikstjórann ekki á nafn.
Tæplega áratug síðar sagði Chopra skilið við Bollywood og reyndi fyrir sér í Hollywood. Hún viðurkennir að það hafi verið mikil áskorun og enginn hafi tekið hana alvarlega til að byrja með. Hún giftist Nick Jonas árið 2018 og eiga þau saman stúlkuna Malti, eins árs.
