Hljómsveitin Fussumsvei hefur sent frá sér lagið „Það verður gaman“. Um er að ræða mikla gleðisprengju sem má hlýða á í spilaranum hér að neðan.

Fussumsvei er hljómsveit sem tók þátt í Músíktilraunum 1998 en spilaði lítið eftir það nema einstaka sinnum fyrir vini og kunningja. Nú er hljómsveitin að vakna úr dvala og gefur út þetta stuðlag sem allir ættu að geta sungið og trallað með.

Meðlimir Fussumsvei eru Kolbeinn Tumi Haraldsson sem spilar á orgel og syngur bakraddir, Garðar Guðjónsson á bassa, Valur Arnarson, söngur, Ólafur Brynjar Bjarkason, gítar og bakraddir, og Sigurður Bragason, trommur.

Kolbeinn Tumi hefur starfað í hljómsveitum á borð við Kviku, Fox Safari og Óreglu. Valur söng um tíma í hljómsveitunum, Skrítnum og „Sauðfé á mjög undir högg að sækja í landi Reykjavíkur“.

Aðrir meðlimir hljómsveitarinnar eru miklir músíkunnendur en hafa verið lítt áberandi í tónlistarlífinu. Fussumsvei liðar vonast til að geta glatt sem flesta og stefna á að gefa út fleiri lög á næstu mánuðum.