Það má með sanni segja að eitt af partýum ársins hafi farið fram í gær en þá fagnaði drottning áhrifavaldanna, Birgitta Líf Björnsdóttir, þrítugsafmæli sínu á skemmtistað sínum B5. Í tilefni dagsins var skemmtistaðurinn vel skreyttur með bleikri lýsingu í stíl við kjól Birgittu sem tjaldaði öllu til í tilefni dagsins.

Eins og gefur að skilja var rjómanum af samfélagsmiðlastjörnum Íslands boðið til gleðskaparins sem og ráðamönnum þjóðarinnar. Þannig mættu meðlimir LXS-gengisins að sjálfsögðu sem og Æðis-drengirnir þrátt fyrir stutt en eldfim orðaskipti á dögunum milli meðlima hópanna. Áslaug Arna Sigurbjörnsdóttir, vísinda-, iðnaðar- og nýsköpunarráðherra Íslands, lét sig ekki heldur vanta ásamt vinum og fjölskyldu Birgittu Lífar.

Skemmtiatriðin voru ekki af verri endanum en meðal þeirra sem tróðu upp voru Jón Jónsson, Herra Hnetusmjör og sjálfur Gísli Pálmi. Teitið fór væntanlega ekki fram hjá neinum Íslendingi sem er virkur á Instagram en kveðjum og myndum af Birgittu Líf og viðburðinum rigndi inn á miðilinn.

Sjón er sögu ríkari