Þegar ung kona fékk tækifæri til að bjarga lífi kærasta síns þá hugsaði hún sig ekki tvisvar um og lagðist undir hnífinn fyrir hann. Rúmlega hálfu ári seinna hélt hann framhjá henni og sagði að hún hefði aðeins gefið honum nýra til að líta vel út.
Hin bandaríska Colleen opnar sig um þetta í nokkrum myndböndum á TikTok sem hafa farið eins og eldur í sinu um netheima.
Fyrir sex árum síðan var Colleen í sambandi með karlmanni sem hafði glímt við krónískan nýrnasjúkdóm frá því að hann var sautján ára gamall. Hann þurfti að gangast undir himnaskiljun á blóði (e. dialysis) og nýrun hans voru aðeins með um fimm prósent virkni.
„Ég ákvað að athuga hvort ég gæti gefið honum nýra, ég vildi ekki horfa á hann deyja,“ segir hún.
Það kom í ljós að hún var fullkominn nýrnagjafi fyrir hann, þau gengust undir aðgerðirnar og náðu fullum bata.
Sumir hefðu kannski haldið að kærastinn væri henni ævinlega þakklátur en hann endurgalt henni þetta með því að halda framhjá henni sjö mánuðum seinna.
@colleeeniie Reply to @gina.phamm Who’s interested in part 3? 😅 #fyp #foryoupage #lovestory #relationship #kidneydonor ♬ I am at ur moms house – Elizabeth Chetwynd
Colleen greinir frá þessu í öðru myndbandi. Þáverandi kærasti hennar sagði henni að hann ætlaði til Las Vegas í steggjun með vinum sínum úr kirkjunni. Hún var í miðjum lokaprófum og treysti honum fullkomnlega svo hún pældi ekkert meira í því. En eftir ferðina viðurkenndi hann að hafa haldið framhjá.
„Eftir mörg rifrildi ákvað ég að fyrirgefa honum og gaf honum annað tækifæri,“ segir hún.
En þremur mánuðum seinna hætti hann með henni, í gegnum símann í þokkabót, og sagði: „Ef okkur er ætlað að vera saman þá mun Guð leiða okkur saman á ný.“
Ekki nóg með það þá sagði hann við hana: „Þú gafst mér bara nýra til að líta vel út.“
Það er óhætt að segja að netverjar séu í liði með Colleen. „Hann áttar sig ekki á alvarleikanum á bak við það að gefa nýra. Þú bókstaflega fórnaðir lífi þínu fyrir einhvern. Þú ert falleg sál,“ segir einn netverji.
The Sun greinir einnig frá.