Áhrifavaldurinn og fyrirsætan Sumner Stroh varpaði fram sprengju á mánudaginn þegar hún birti myndband á TikTok og hélt því fram að hún hefði átt í áralöngu ástarsambandi við Adam.
Í kjölfarið stigu fjórar aðrar konur fram til viðbótar og sögðust hafa fengið daðursleg og kynferðisleg skilaboð frá söngvaranum.
Sjá einnig: Framhjáhaldið sem skekur Hollywood – Adam Levine rýfur þögnina og aðrar stjörnur blanda sér í málið
Behati hefur ekki tjáð sig um málið en fjölskylduvinur ræddi málið við E! News og sagði fyrirsætuna trúa eiginmanni sínum.
„Behati er í uppnámi en hún trúir honum að það hafi ekkert líkamlegt átt sér stað. Þau hafa verið saman allan þennan tíma. Henni finnst þau vera hamingjusamlega gift og fékk áfall þegar hún komst að því hvað hafði átt sér stað án hennar vitundar,“ sagði vinur parsins við E!.
Söngvarinn tjáði sig um málið á þriðjudaginn og þvertók fyrir að hafa haldið framhjá eiginkonu sinni en viðurkenndi að hann hafi „stundum átt óviðeigandi“ samskipti við aðrar konur á netinu.
Fjölskylduvinurinn sagði einnig að það væru „engar afsakanir fyrir óviðeigandi hegðun hans“ en Adam heldur því staðfastlega fram að „ekkert líkamlegt“ hafi gerst.
„Hann er vonsvikinn út í sjálfan sig og leiður að hafa sært fjölskyldu sína svona. Þetta hefur látið hann átta sig á því að hann þarf að vinna í ýmsu,“ sagði vinurinn.
Sjá einnig: Skandallinn vindur upp á sig – Fleiri fyrirsætur stíga fram og birta svakaleg skjáskot
Tvær fyrirsætur, Alyson Rose og Myraka, birtu skjáskot af meintum samskiptum sínum við söngvarann á samfélagsmiðlum í gær.
Síðan þá hafa fleiri konur stigið fram, meðal annars fitness áhrifavaldurinn Ashley Russell.
Adam og Behati hafa verið saman í tíu ár, gift í átta ár og eiga von á sínu þriðja barni saman.
