Myndin verður sýnd í svonefndum Vitranaflokki á RIFF, sem tekur til mynda nýrra og áhugaverðra leikstjóra. Kvikmyndahátíðin RIFF stendur yfir í Háskólabíói við Hagatorg dagana 29. september til 9. október.
Eismayer er byggð á sannsögulegum atburðum og fjallar um Eismayer, þann liðþjálfa í austurríska hernum sem er hvað harkalegastur og vekur mestan ótta. Eismayer er samkynhneigður, en það er leyndarmál sem hann hefur varðveitt vel til að draga upp sjálfsmynd af karlmannlegum manni sem er samfélaginu þóknanlegri.
Hann verður ástfanginn af nýliðanum Mario Falak sem er opinberlega samkynhneigður og myndin sýnir okkur þróun sambands þeirra og þau átök sem því fylgir.
Í umsögn dómnefndar, landssambands ítalskra kvikmyndagagnrýnenda, segir um myndina að hún sé áberandi þroskuð og vel gerð fyrir fyrsta höfundaverk og framúrskarandi dæmi um áhrifaríka og hnökralausa frásögn.
Um RIFF
RIFF er nú haldin í nítjánda skiptið og fer fram í Háskólabíói við Hagatorg í ár. Hátíðin hefur skipað sér á bás sem ein eftirsóttasta kvikmyndahátíð Norðurlanda. Meginhlutverk RIFF er að tryggja víðtækt úrval af hágæða, óháðri kvikmyndaframleiðslu með áherslu á unga kvikmyndagerðarmenn. Tilgangur hátíðarinnar er að vekja áhuga á kvikmyndamenningu, auka kvikmyndalæsi og auðga kvikmyndamenningu á Íslandi með áherslu á alþjóðlega strauma. RIFF er einnig ætlað að skapa farveg fyrir viðskipti, nýsköpun, listsköpun, myndun alþjóðlegs tengslanets og samræðu við samfélagið og samtímann. RIFF er óháð hátið, rekin án hagnaðar.
