Tónlistarkonan Dagbjört Rúriksdóttir, sem gengur undir listanafninu Día, var að gefa út nýtt lag í dag og textamyndband.

Lagið heitir „Rauðu flöggin“ og er væntanlegt á Spotify 8. apríl næstkomandi. Þann 15. apríl verður karíókí útgáfa af laginu aðgengileg á YouTube.

Dagbjört samdi lagið ásamt gítarleikaranum Emil Hreiðari Björnssyni. „Textinn í laginu er saminn um tíma í mínu lífi þar sem ég fann mig í óheilbrigðum aðstæðum,“ segir Dagbjört.

„Ég hunsaði mestmegnis verndandi röddina innra með mér, sem var að reyna að leiða mig í rétt átt allan þennan tíma. Röddina sem ég kalla Guð, en aðrir kalla æðri mátt eða innsæi til dæmis,“ segir hún.

„Meðvirkni og þráhyggja réðu för þar til ég fékk nóg og leyfði Guð loks að ráða í staðinn. Stuttu eftir það komst ég út úr aðstæðunum, eftir þó nokkrar tilraunir til að koma mér í burtu.“

Dagbjört segir að hún sé enn að glíma við erfiðleika. „Ég er enn að kljást við taugaveiklun, þráhyggju, depurð og ringulreið eftir þennan tíma. En ég veit þó að ég valdi rétt. Tilgangur lagsins er fyrst og fremst að hvetja aðra til að standa með sjálfum sér og eltast við það sem er heilbrigt og gott fyrir mann.“

Þú getur fylgst með Dagbjörtu á Instagram. Hlustaðu á lagið hér að neðan.