Leikarinn Bruce Willis ætlar að stíga til hliðar og hætta að leika. Ástæðan fyrir þessari ákvörðun er sú að hann hefur greinst með málstol, en orsakast það yfirleitt af skaða á vinstri hlið heilans. Málstol veldur erfiðleikum í tali og því hefði verið erfitt fyrir Bruce að halda ferlinum áfram.
Emma Heming Willis, eiginkona Bruce, greinir frá þessu í færslu sem hún birti á Instagram-síðu sinni. Í færslunni útskýrir hún að Bruce hafi glímt við heilsuvandamál og hafi nýlega greinst með málstol. „Eftir mikla umhugsun hefur Bruce ákveðið að stíga til hliðar frá ferlinum, sem skiptir hann svo miklu,“ segir Emma.
Bruce er hvað þekktastur fyrir leik sinn í kvikmyndum á borð við Die Hard, Pulp Fiction, The Fifth Element, The Sixth Sense og Sin City. Ferill hans spannar heil 44 ár og hefur hann unnið til Golden Globe og Emmy verðlauna fyrir leik sinn.
