Tónlistarmaðurinn Jason Derulo og TikTok-stjarnan Jena Frumes eru hætt saman. Söngvarinn greindi frá þessu á samfélagsmiðlum í gærkvöldi og sagði að þau hefðu ákveðið „að fara í sundur“ og ætla að einbeita sér að því að ala upp fjögurra mánaða gamlan son þeirra, Jason King.
„Hún er frábær móðir en okkur finnst eins og með því að vera í sundur getum við verið besta útgáfan af sjálfum okkur og eins góðir foreldrar og við mögulega getum,“ skrifaði Jason Derulo á Twitter.
„Vinsamlegast virðið einkalíf okkar á þessum tíma.“
Jena and I have decided to part ways.
She is an amazing mother but we feel being apart at this time will allow us to be the best versions of ourselves and the best parents we could be. Pls respect our privacy in this time.— Jason Derulo (@jasonderulo) September 23, 2021
Sambandsslitin koma mörgum á óvart eins og sjá má í svörum netverja á Twitter. Aðeins einum degi áður deildi Jena hjartnæmri færslu í tilefni afmælis Jasons.
„Þú ert myndarlegasta, metnaðarfyllsta, hæfileikaríkasta, kjánalegasta og yndislegasta manneskja í heimi,“ skrifaði Jena í færslu á Instagram á miðvikudaginn, sem hún hefur nú eytt.
„Þú gerir mig heila og ég er svo þakklát fyrir ástina sem við deilum. Þú og [Jason King] gera mig að hamingjusömustu konu í heimi og ég get ekki beðið eftir að búa til fleiri minningar með ykkur.“
Jena hefur ekki tjáð sig um sambandsslitin opinberlega.
Jason og Jena kynntust í ræktinni rétt áður en Covid-faraldurinn hófst. Þau eyddu miklum tíma saman í samkomubanninu og nutu mikilla vinsælda á TikTok þar sem þau deildu reglulega myndböndum saman.
Þau eignuðust sitt fyrsta barn saman í maí 2021.
