Sigríður Halla Magnúsdóttir opnar sig um alvarlega heilsubresti og baráttu sinni við íslenska heilbrigðiskerfið í forsíðuviðtali Vikunnar sem kom út í dag.
Það tók 26 ár fyrir Sigríði Höllu að fá greiningu. Hún var 38 ára gömul þegar hún var loks greind með endómetríósu. Þrátt fyrir greiningu fékk hún ekki betri þjónustu og endaði með að leita til sérfræðings í Evrópu eftir að hún rakst á enn annan vegg í heilbrigðiskerfinu hér á landi.
Frá því að Sigríður Halla byrjaði á blæðingum fékk hún mjög slæma túrverki frá baki og niður fætur. Suma daga komst hún ekki fram úr vegna verkja. Þegar hún varð eldri byrjaði að bera á öðrum kvillum. „Ég var farin að fá mígrenisköst, finna fyrir svima, ógleði, meltingartruflunum. Fæðuóþol hrjáði mig, ég fékk stingandi sársauka í mjaðmirnar, vondan hjartslátt, hárlos, óútskýranlegt þyngdartap og mikið gróðurofnæmi,“ segir hún.
Sigríður Halla gekk á milli lækna sem gáfu henni þau svör að hún væri með lágan sársaukaþröskuld, vefjagigt og gæti jafnvel verið svolítið hysterísk.
Í viðtalinu fer Sigríður Halla yfir sjúkrasögu sína og segir frá því hvernig ástand hennar fór versnandi. Hún var loksins greind með endómetríósu en þrátt fyrir greiningu fékk hún ekki betri þjónustu.
„Ég grét af gleði vegna þess að nú vissi ég að ég var ekki ímyndunarveik en ég grét líka af sorg. Á hvern getur kona treyst ef hún fær ekki stuðning þeirra lækna sem hún leitar til? Mun ég alltaf þjást eða er einhver þarna úti sem sýnir þessu skilning og er tilbúinn til að meðhöndla þennan sjúkdóm?“ Segir Sigríður Halla og bætir við að hún hafi verið komin með læknakvíða.
„Mér finnst ekki rétt að vera endalaust vísað frá eða boðin lyf sem ég veit að munu ekki gera gagn,“ segir Sigríður Halla. Hún hafði samband við einn færasta endó-sérfræðing Evrópu, Dr. Gebriel Mitroi í Rúmeníu. Sigríður Halla fór út í aðgerðina í byrjun árs 2021 og hefði ekki mátt bíða mikið lengur.
Hún segir frá aðgerðinni, bataferlinu og líðan sinni í dag í nýjasta tölublaði Vikunnar.
