Listaspírurnar Matthías Tryggvi Haraldsson, söngvari Hatara og leikskáld, og Kristlín Dís Ingilínardóttir, blaðamaður og mannfræðinemi, eru hætt saman og slá nú í gegn í sitthvoru lagi. Parið vakti mikla athygli bæði fyrir hugmyndir sínar og framúrskarandi tískuvit en þau eru bæði beittir pennar.

Matthías Tryggva ættu flestir landsmenn að þekkja sem söngvara Hatara, hljómsveitarinnar sem fór fyrir hönd Íslands í Eurovision árið 2019 með lagið „Hatrið mun sigra“. Hatari hreppti tíunda sæti fyrir Ísland, sem var besti árangur Íslands í áratug. Hljómsveitin vakti einnig heimsathygli, bæði fyrir atriði sitt og einnig fyrir að vekja athygli á andstöðu sinni við hernám Ísraela í Palestínu.

Matthías útskrifaðist frá sviðshöfundabraut Listaháskóla Íslands vorið 2018 og skrifaði leikritið Griðastað, sem hlaut þrjár tilnefningar til Grímunnar 2019.

Kristlín Dís er að ljúka námi í mannfræði og er blaðamaður hjá Fréttablaðinu. Hún hefur vakið mikla athygli fyrir pistlaskrif sín síðustu ár. Eins og Matthías hefur hún ekki setið þögul heldur breitt út boðskap sem er henni mikilvægur í pistlum sínum. Kristlín hefur meðal annars skrifað um kynjamisrétti, slæm áhrif klámáhorfs og kynferðisofbeldi. Helgarviðtöl hennar í Fréttablaðinu hafa hlotið mikið lof og ljóst er að hún er vandaður penni sem er rétt að byrja.