Ryan Fischer, starfsmaður Lady Gaga, var skotinn í bringuna í gærkvöldi. Hann var úti að labba með hunda söngkonunnar á meðan hún er í tökum á Ítalíu. Árásarmennirnir skutu hann fjórum sinnum í bringuna áður en þeir gripu tvo af hundum hennar og keyrðu í burtu á hvítri BMW-bifreið. The Sun greinir frá.
Ekki er vitað hvers vegna árásin varð en talið er að planið hafi verið að ræna hundum söngkonunnar og heimta lausnargjald. Lady Gaga hefur þegar boðist til að borga 500 þúsund Bandaríkjadali í lausnargjald og að hún muni ekki rannsaka málið frekar skuli hundarnir koma til baka í heilu lagi.
Þegar sjúkraliðar komu á staðinn var Fischer enn á lífi en í lífshættulegu ástandi. Hann var færður á spítala en ekki hafa borist neinar fregnir á ástandi hans eftir komu þangað. Árásarmennirnir hafa enn ekki fundist.
