Síðustu misseri hafa svokallaðir múmínbollar verið mjög vinsælir hérlendis. Um er að ræða bolla með myndum af múmínálfunum sem birtast í verkum rithöfundarins Tove Jansson. Mynd sem sýnir aragrúa af slíkum bollum hefur vakið mikla athygli á samfélagsmiðlum. Myndin var á birt á sérstökum Facebook-hóp fyrir aðdáendur bollana.
Á myndinni má sjá 102 bolla sem raðað hefur verið upp á hvorn annan. Samkvæmt útreikningum netverja kosta þessir bollar samanlagt líklega tæplega hálfa milljón.
Það sem vekur þó mesta athygli, er að myndin var birt í fyrradag, en það var einmitt dagurinn þar sem jarðskjálftahrina reið yfir landið. Margir gátu því ímyndað sér risastórt tjón, hefðu bollarnir endað illa í jarðskjálftunum.
Einn netverji sem deildi myndinni við miklar undirtektir sagði:„Einhver í múmíngrúppunni ákvað að í dag af öllum dögum, væri dagurinn til þess að raða safninu sínu upp fyrir myndatöku.“
í samtali við DV sagðist eigandi bollana hafa safnað þeim saman af miklum móð síðustu ár. Hann létti þrýstingnum af samfélagsmiðlum þegar hann greindi frá því að hann hefði náð að koma bollunum í öruggt skjól áður en jarðskjálftarnir riðu yfir. Bollana hefur hann alla notað nema nýjustu tvo sem vígðir verða í dag.