Yael Cohen Aris, 25 ára gömul fyrirsæta, er allt annað en sátt eftir að hún sá kynlífsdúkku sem lítur alveg út eins og hún sjálf.
Kynlífsdúkkan sem um ræðir er framleidd af fyrirtækinu Doll Studio en Yael segir að fyrirtækið hafi stolið útliti sínu fyrir dúkkuna. Hún segir til að mynda að dúkkan sé með eins fæðingarblett og hún.
Yael heldur því fram að Doll Studio hafi notað myndir og myndbönd af sér til að auglýsa dúkkuna en hún segir fyrirtækið hafa gert allt þetta án þess að biðja um leyfi hennar eða samþykki.
Það er óhætt að segja að Yael sé nokkuð vinsæl fyrirsæta en hún er með yfir milljón fylgjendur á samfélagsmiðlinum Instagram. Það var einmitt einn af fylgjendum hennar sem gerði henni vart um tilvist kynlífsdúkkunnar. „Það kom mér á óvart að ég kannaðist við þetta kunnuglega andlit,“ segir Yael í samtali við Daily Star.
„Þá skildi ég samt ekki alveg hvað var í gangi svo ég gaf því ekki gaum og gleymdi því.“
Nú skilur Yael hvað var í gangi og hefur hún ákveðið að fara í hart. Hún segist vera komin með lögfræðing í málið en hún krefst þess að Doll Studio innkalli kynlífsdúkkuna og að hún fari úr hillum kynlífsverslana.
„Þau stálu andlitinu mínu, líkamanum mínum, jafnvel minnstu smáatriðum eins og fæðingarblettinum undir vörunum mínum – þau notuðu meira að segja nafnið mitt!“ segir hún en dúkkan heitir Yael eins og hún.
