Þátturinn Matur og heimili, í umsjón Sjafnar Þórðar, er á dagskrá Hringbrautar í kvöld kl. 19 og aftur kl. 21.
Að þessu sinni heimsækir Sjöfn æskuvinina Elías og Karl sem hafa opnað glæsilegan veitingastað í húsnæði gamallar stálsmiðju við Granda, Héðinn Kitchen & Bar.
Staðurinn var opnaður í sumar með pomp og prakt og hefur notið mikill vinsælda síðan. Sjöfn heimsækir stofnendur og eigendur staðarins, æskuvinina, Elías Guðmundsson og Karl Viggó Vigfússon sem báðir eru alvanir veitingamenn og fær að heyra forsöguna um tilurð staðarins, hönnunina og sérstöðu matargerðarinnar.
„Áherslurnar í matargerðinni eru árstíðarbundnar og markmiðið er að vera með spennandi seðil. Við erum að tala árstíðarbundinn matseðil, spennandi en samt sem áður afslappaðan „less is more“, segja þeir félagar Elías og Viggó og eru stoltir að vera með öflugt fagfólk með í för á öllum sviðum veitingahússins.
Omry Ahraham rekur Kryddhúsið ásamt eiginkonu sinni, Ólöfu Einarsdóttur. Omry er mikill ástríðukokkur og þekkir kryddheiminn vel. Omry er frá Ísrael og á ættir að rekja til Marokkó og Íraks og er alinn upp við ríka kryddhefð í matarmenningu Miðausturlanda.
„Matarkúlturinn í Ísrael er mjög blandaður og kemur frá mörgum löndum, til að mynda Evrópu, Norður Afríku og Arabalöndunum. Mér finnst matarkúlturinn í Ísrael mjög góður,“segir Omry og er iðinn við að halda matarvenjum og hefðum frá heimkynnunum hér á Íslandi.
Sem fyrr segir er Matur og heimili á dagskrá Hringbrautar kl. 19 og 21 í kvöld. Innslag úr þættinum með sjá í spilaranum hér fyrir neðan.