„Ghosting“ er hugtak sem við erum farin að heyra sífellt oftar. Þetta er því miður ansi algengt fyrir einhleypt fólk að upplifa þegar það opnar sig fyrir tækifærum ástarinnar. En ekki örvænta, ein kona er með ágætis lausn.

Það er kallað „ghosting“ þegar manneskja sem þú ert að hitta eða tala við, eða jafnvel ert í sambandi með, hættir að svara skilaboðum og símtölum upp úr þurru og gefur enga útskýringu fyrir því.

Kristen Beatty hefur verið „ghostuð“ svo oft að hún neitar að gera sig tilbúna fyrir stefnumót ef karlmaðurinn hefur ekki sent henni skilaboð tveimur tímum fyrir stefnumótið.

Kristen greindi frá þessu í myndbandi á TikTok. „Þetta er nýtt fyrir mig. Klukkan er sjö um kvöld og ég er að fara á stefnumót klukkan níu. Eins og sést er ég alls ekki tilbúin. Ekki búin að farða mig né gera á mér hárið. Ég er í náttfötunum,“ segir hún.

„Yfirleitt væri ég byrjuð að gera mig tilbúna eða byrjuð að hugsa um það, en það hefur gerst allt of oft að ég sé „ghostuð“ eða hann aflýsi á síðustu stundu, þegar ég er BÚIN að gera mig til og það er sjúklega pirrandi. Þannig ég er að prófa nýtt, ég neita að gera mig til fyrr en ég heyri í honum því mér finnst eins og ég ætti að heyra í gaurnum sem ég er að fara að hitta allavega tveimur tímum áður en við hittumst. Þannig svona mun ég líta út á meðan við bíðum.“

@kristenbeatty24New 2 hour rule ##single ##dating ##tinder ##hinge ##firstdate ##whydomen ##kelseaballerini♬ original sound – kristenbeatty24

Kristen fékk sér að borða um hálf átta og ekkert búin að heyra í manninum. Hún fékk sér ís um átta leytið og greindi frá því að maðurinn hefði haft samband og aflýst stefnumótinu.

Athæfi Kristen hefur slegið í gegn meðal kvenna á TikTok. Hún er greinilega ekki sú eina sem er komin með nóg af því að eyða tíma og orku í að gera sig til fyrir stefnumót sem endar með að verða ekki.

„Ef þú heyrir ekki í gaurnum nokkrum sinnum daginn sem þið ætlið að hittast, ekki gera þig til eða hugsa um að fara,“ segir ein kona.

„Ef hann virðir ekki tíma þinn núna þá mun hann aldrei gera það. Hann hefði átt að vita þetta í síðasta lagi fyrr um daginn,“ sagði önnur.