Þátturinn Matur og heimili í umsjón Sjöfn Þórðar er á dagskrá Hringbrautar í kvöld. Þar verður veitingastaðurinn Sker á Ólafsvík heimsóttur.
Það er ung fjölskylda sem á og rekur veitingastaðinn, Lilja Hrund Jóhannsdóttir matreiðslumaður og fjölskyldan hennar standa þar vaktina og töfra fram dýrindis sælkeraveitingar í fallegu umhverfi við höfnina. Skerið hefur sterka skírskotun í hafið og sjávarfangið sem þar er að finna.
Lilja Hrund opnaði staðinn aðeins 23 ára gömul, rétt eftir að hún útskrifaðist sem matreiðslumaður: „Eftir að ég fór í Húsmæðraskólann á Hallormsstað var framtíðin ráðin, ég fann ástríðuna fyrir matargerð og naut mín í eldhúsinu. Minn draumur var strax að opna veitingastað heima og koma með þekkinguna heim, það kom ekkert annað til greina.“
