Naomi Winfield, 26 ára móðir frá Birmingham á Bretlandi, hefur orðið fyrir aðkasti frá ókunnugum vegna þess að hún gefur syni sínum brjóst. Hún hefur verið kölluð ógeðsleg fyrir að gefa syni sínum, sem er þriggja ára gamall, brjóstamjólk. The Sun fjallaði um málið.

Naomi segir að þau mæðginin tengist með brjóstagjöfinni og að hún ætli að halda því áfram þar til hann byrjar í skólanum. Þrátt fyrir ljótar athugasemdir er Naomi viss um að hún sé að gera hið rétta.

„Ég hef fengi fleiri ljótar athugasemdir en góðar,“ segir hún. „Fólk hefur sagt börnunum sínum að horfa ekki og að þetta sé ógeðslegt. Fólk segir að hann sé of gamall og að hann muni gera þetta að eilífu. Þau segja að ég sé sjálfselsk og að ég geri þetta fyrir mig því ég get ekki horfst í augu við það að hann er að verða eldri.“

Naomi segir að hún hafi ekki valið að fara þessa leið. „Þetta gerðist bara. Ef hann er órólegur og þarf að slaka á þá róar þetta hann niður,“ segir hún. „Það hefur komið fyrir að hann hefur ekki borðað og brjóstagjöfin hefur þá komið í veg fyrir að hann þurfi að fara á spítalann vegna þess.“

Naomi gefur syni sínum brjóst um það bil fjórum sinnum á dag en sonur hennar borðar einnig fasta fæðu. Sonur hennar byrjar í skóla í haust og þá ætlar hún að hætta brjóstagjöfinni. Hún viðurkennir að hún muni sakna þess. „Við setjumst niður saman, hann fær sér mjólk, við knúsumst og ég syng fyrir hann. Þetta er sérstaka augnablikið okkar. Þegar við erum búin að vera aðskilin þá hjálpar þetta okkur að tengjast aftur.“