Í júní 2020 fór myndband af konu sem neitaði að nota grímu í matvöruverslun eins og eldur í sinu um netheima. Sandrella er konan í myndbandinu og mætti til Dr. Phil til að segja sína hlið af sögunni.
Ekki nóg með að myndbandið hafi farið í dreifingu um alnetið heldur var það einnig tekið fyrir í fjölmiðlum. Sandrella hefur í kjölfarið verið harðlega gagnrýnd vegna ákvörðunar sinnar að nota ekki grímu og hefur meðal annars verið kölluð „Karen“.
Það hefur varla farið framhjá netverjum að undanfarið ár hefur nafnið Karen fengið á sig slæmt orð. Það er notað yfir hvítar forréttindakonur sem liggja ekki á skoðunum sínum og vilja gjarnan fá að tala við yfirmann. Sandrella kveðst ekki vera „Karen“ og segir að myndbandið segi aðeins hálfa söguna.
Atvikið átti sér stað í matvöruverslun í Los Angeles. Í myndbandinu má sjá Sandrellu rífast við aðra viðskiptavini og halda því fram að hún þurfi ekki að nota grímu. En á þessum tíma var það skylda að nota grímu í verslunum og öðrum almenningsstöðum.
„Demókrata svín,“ öskrar Sandrella meðal annars á fólkið. Hún sagði að hún gæti ekki notað grímu af læknisfræðilegum ástæðum. „Læknirinn minn leyfir mér ekki að nota grímu,“ sagði hún.
— D. Giles (@ItsRellzWorld) June 27, 2020
Sandrella segir að umrætt myndband segi ekki alla söguna. „Ég fór beint til verslunarstjórans og útskýrði stöðuna. Hún sagði að bara þennan dag mætti ég fara inn í verslunina án þess að nota grímu. Ég sá þennan mann sem stendur þarna. Hávaxinn, miðaldra og með grímu, og hann byrjaði að öskra á mig og kalla mig tík og segja mér að nota grímu. Og ég brást við […] Allt í einu var ég umkringd fólki sem var að gera grín að mér, kalla mig Karen. Ég er ekki Karen. Karen er manneskja sem dæmir aðra, ég dæmi ekki aðra. Það var ég sem var dæmd,“ segir hún og bætir við að sér hafi liðið eins og maðurinn ætlaði að ráðast á hana.
„Því miður var ég harðlega gagnrýnd af vinum mínum eftir þetta atvik. Ég er búin að upplifa mikinn kvíða í kjölfarið.“
Sandrella segist ekki vilja útskýra læknisfræðilegan kvilla sinn, sem hamlar henni að nota grímu, eða ræða hann eitthvað frekar. „Ég þarf þess ekki,“ segir hún.
„Mér finnst eins og það ætti ekki að vera skylda að nota grímu. Hundruð þúsunda einstaklinga deyja úr flensu á hverju ári, en það er enginn að missa sig yfir því.“
Horfðu á Sandrellu hjá Dr. Phil í spilaranum hér að neðan.
