Ein þeirra samsæriskenninga sem skotið hafa upp kollinum koma frá manni nokkrum sem telur að streymisveitan Netflix standi að baki áróðursherferð til að afla Daða og Gagnamagninu vinsælda. Þá telur samsæriskenningasmiðurinn að það sé möguleiki á að Russel Crowe hafi fengið greitt frá Netflix fyrir að deila myndbandinu hans Daða en deilingin hans vakti mikla athygli.
„Eru Daði og Will Ferrel bókaðir í þátt Graham Northon Show til að kynna Eurovisionmynd Netflix?“ veltir samsæriskenningasmiðurinn fyrir sér. Þá birti hann einnig mynd af skjáskoti þar sem svo virðist vera sem konu sé boðin dágóð upphæð fyrir að deila laginu hans Daða.
„Hvers vegna er verið að bjóða fólki peningagreiðslur til ad pósta myndbandinu hans Daða, stendur Netflix á bakvið það? Getur RÚV látið sem ekkert sé? Er Netflix búið að velja sinn sigurvegara og er þess vegna að reka kostnaðarsama PR herferð fyrir hann?“ segir samsæriskenningasmiðurinn einnig og veltir því fyrir sér hvort það muni einhver eiga við kosningarnar í Söngvakeppninni. Eins og mörgum ætti að vera kunnugt er mynd um Eurovision væntanleg, en þar munu þau Will Ferrell og Rachel McAdams leika íslenska söngvara í Eurovision.
Eins og áður segir þá hefur Daði nú tjáð sig um þessar samsæriskenningarnar. „Ég er að sjá út um allt að fólk heldur í alvöru að Gagnamagnið sé sponsað af Netflix. Ástæðan skilst mér að sé sú að lagið á að vera í nýju seríunni af Stranger Things. Vá hvað ég væri til í að þetta væri satt,“ segir Daði.
Tíst Daða hefur vakið mikla athygli á samfélagsmiðlinum. Notandi nokkur segir til að mynda að lagið hans ætti það fyllilega skilið að vera í Stranger Things. Þá velta aðrir því fyrir sér hvers vegna lagið ætti ekki að vera notað í þáttunum vinsælu en það má segja að lag Daða og Gagnamagnsins passi inn í tónlistarstíl þátttanna.
