fbpx
Þriðjudagur 19.janúar 2021
Fókus

Sakamál: Horfin eiginkona, skapstór eiginmaður og afbrigðilegur tengdafaðir

Ágúst Borgþór Sverrisson
Laugardaginn 28. nóvember 2020 20:40

Susan Powell hvarf árið 2009. Youtube-skjáskot.

Ekki missa af Helstu tíðindum dagsins í pósthólfið þitt

Lesa nánar

Susan Cox Powell var gift tveggja barna móðir, fædd árið 1981. Sumarið 2008 tók hún upp hrollvekjandi myndband þar sem hún lýsti skemmdum á heimili sínu sem hún sagði að eiginmaður sinn hefði valdið. Hún sagði að hjónabandið væri stormasamt og ef eitthvað kæmi fyrir hana skyldi fólk reikna með að henni hefði verið gert mein.

Susan var gift manni að nafni Joshua Powell sem fæddur var árið 1976 og áttu þau tvo unga syni. Þau kynntust árið 2001 og hófu sambúð upp úr því. Eins og margt ungt fólk höfðu þau ekki mikil auraráð og fengu að búa hjá föður Joshua, Steven Powell, í Portland í Oregon.

Steven Powell, sem þá var miðaldra, var sérkennilegur maður með óþægilegar fýsnir. Hann var skilinn við móður Joshua og hafði sýnt af sér óeðlilega hegðun í hjónabandinu og eftir það. Hann skiptist á klámblöðum við syni sína, Joshua og bróður hans Michael. Hann hafði þá áráttu að njósna um konur, safna upplýsingum um þær og taka myndir af þeim í óþökk þeirra.

Þegar unga parið bjó hjá Steven sýndi hann tengdadóttur sinni óeðlilegan og ónáttúrulegan áhuga. Hann varð hugfanginn af henni og tók upp mörg myndbönd þar sem hann tjáði sig um þrá sína í garð hennar. Hann lét sig dreyma um að þeir feðgarnir gætu með einhverjum hætti deilt henni sem ástkonu. Hann njósnaði um Susan, tók myndir af henni í óleyfi og stal nærfötunum hennar.

Stormasamt hjónaband

Þegar Steven játaði ást sína fyrir Susan brást hún ókvæða við, sem vonlegt var. Þetta varð til þess að þau Joshua gátu ekki lengur búið hjá tengdaföðurnum og fluttu til Utah. Þar eignuðust þau tvo drengi.

Eins og myndbönd Susan bera með sér var hjónabandið stormasamt. Steven var sagður vera stjórnsamur og skapstór. Þá sakaði Susan hann um óhóflega peningaeyðslu og hjónin deildu oft um peningamálin.

Þann 5. desember árið 2009 fór Susan með syni sína tvo í kirkju. Trúfélagið á staðnum var eitt af ágreiningsefnum hjónanna en Joshua hafði sagt sig úr því og hataðist við kirkjuna. Susan var hins vegar trúrækin.

Síðdegis sama dag heimsótti nágranni Susan og það var í síðasta skipti sem einhver sá hana á lífi, svo vitað sé. Þann 7. desember tilkynntu ættingjar um hvarf fjölskyldunnar. Susan hafði ekki skilað sér í vinnu og drengirnir höfðu ekki mætt í leikskólann á mánudeginum. Síðar kom í ljós að það var aðeins Susan sem var horfin.

Joshua Powell lést í bruna árið 2012. Youtube-skjáskot

Grunur fellur á eiginmanninn

Joshua og synirnir tveir komu fram seint á mánudeginum. Sagðist Joshua hafa farið með drengina í útilegu. Þetta þótti grunsamlegt. Hvers vegna tilkynnti hann ekki í leikskólann að drengina myndi vanta á mánudeginum? Hann sagðist hafa farið dagavillt og talið vera sunnudag.

Ekkert kom fram sem renndi stoðum undir þá fullyrðingu að feðgarnir hefðu í raun farið í útilegu. Þá þótti það vera sérkennilegt tiltæki að fara með ung börn í útilegu í svo miklum kulda. Joshua sagðist hafa hringt margsinnis í Susan en ávallt lent á talhólfi. Hann hefði því ákveðið að segja henni bara frá þessu þegar þeir kæmu til baka. En lögreglan fann síma Susan í bílnum hans. Hann gat ekki gefið skýringu á því hvers vegna síminn var þar.

Þá kom í ljós að Joshua hafði dagana fyrir hvarfið leyst út peninga í nafni Susan, líftryggingu hennar og innistæðu á banka. Það varð ekki til að minnka grunsemdir gagnvart honum.

Steven Powell hafði óeðlilegan áhuga á Susan. Youtube-skjáskot

Allir dánir sem gætu vitað eitthvað

Rannsóknin á hvarfi Susan þróaðist með undarlegum hætti. Í fyrstu benti allt til þess að lögreglan væri með sekan eiginmann í haldi. En það gekk illa að sanna glæp á hann með óyggjandi hætti.

Lögreglan vann út frá þeirri kenningu að Joshua hefði myrt Susan og flutt lík hennar í bíl bróður hans, Michael. Michael hafði selt bíl sinn í brotajárn á bílapartasölu í Oregon tveimur vikum eftir hvarf Susan. Þetta þótti lögreglu mjög grunsamlegt. Sporhundar greindu lykt af líki í bílnum en DNA-greining leiddi ekkert óyggjandi í ljós.

Joshua sagði einu sinni við vini sína að auðvelt væri að fela lík í námugöngum í Utah. Margir telja að lík Susan sé að finna á slíkum stað, en það hefur ekki fundist.

Árið 2012 var enn ekki búið að leysa málið. Þá gerðist hræðilegur atburður, er Josh lagði eld að heimili sínu, þar sem hann bjó með sonum sínum tveimur. Rannsókn leiddi í ljós áverka á sonum hans. Dánarorsök allra þriggja var reykeitrun.

Hinn sérkennilegi tengdafaðir Susan, Steven, var rannsakaður, en ekki var hægt að tengja hann með neinum hætti við hvarf Susan. Hann var hins vegar dæmdur fyrir persónuverndarbrot gegn ungum konum, en hann njósnaði og myndaði konur í laumi til að svala fýsnum sínum. Einnig var hann fundinn sekur um vörslu barnakláms. Fékk hann nokkuð þungan fangelsisdóm fyrir þessi afbrot.

Lögregla taldi lengi vel að Steven hefði upplýsingar um hvarf Susan, þó að hann væri ekki sjálfur grunaður um að hafa myrt hana. En hann var ekki samvinnufús við lögregluna.

Michael, bróðir Joshua, framdi sjálfsvíg árið 2013, er hann fleygði sér fram af húsþaki. Steven, faðir þeirra, dó árið 2018 vegna sjúkdóms

Allir sem lágu undir grun varðandi hvarf Susan eru því látnir. Lögregla hefur hætt rannsókn málsins og ekkert bendir til þess að þessi gáta muni nokkurn tíma leysast. Lögregla gengur hins vegar út frá því Joshua hafi myrt Susan og komið líki hennar fyrir á ókunnum stað.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Nýlegt

Fókus
Fyrir 2 dögum

Hannes birtir einstakar myndir af Davíð Oddssyni

Hannes birtir einstakar myndir af Davíð Oddssyni
Fókus
Fyrir 2 dögum

Feminísk kvikmyndahátíð – Meðal annars stuttmynd úr undirheimum Reykjavíkur

Feminísk kvikmyndahátíð – Meðal annars stuttmynd úr undirheimum Reykjavíkur
Fókus
Fyrir 3 dögum

Mæðgur naktar saman í Playboy

Mæðgur naktar saman í Playboy
Fókus
Fyrir 3 dögum

Ásmundur fylgdi tengdasyni sínum til grafar í dag – „Við eigum góðar minningar um dugnaðar tengdason“

Ásmundur fylgdi tengdasyni sínum til grafar í dag – „Við eigum góðar minningar um dugnaðar tengdason“
Fókus
Fyrir 4 dögum

Manstu eftir ítalska kyntröllinu Fabio? – Svona lítur hann út í dag

Manstu eftir ítalska kyntröllinu Fabio? – Svona lítur hann út í dag
Fókus
Fyrir 4 dögum

Mæðgur tóku þungunarpróf saman – Bjuggust ekki við þessu

Mæðgur tóku þungunarpróf saman – Bjuggust ekki við þessu
Fókus
Fyrir 5 dögum

Rebel Wilson var rænt og ógnað með byssu – „Ég var skíthrædd“

Rebel Wilson var rænt og ógnað með byssu – „Ég var skíthrædd“
Fókus
Fyrir 5 dögum

Sýnir hvernig það er að vera lömuð með „kvíðavaldandi“ æfingu sem allir geta prófað

Sýnir hvernig það er að vera lömuð með „kvíðavaldandi“ æfingu sem allir geta prófað