Um 500 þúsund manns hafa horft á myndband sem maður með notendanafnið sherifelsahly birti á samfélagsmiðlinum TikTok í vikunni. Það er ekki alltaf til frásögu færandi að margir horfi á myndbönd en myndbandið sem sherifelsahly birti fjallar um Ísland og forrit sem hann segir Íslendinga nota.

„Ísland er með smáforrit fyrir sifjaspell og það er reyndar frekar sniðugt hjá þeim,“ segir hann í upphafi myndbandsins. Smáforritið sem maðurinn talar um í myndbandinu er Íslendingabók en flestir iPhone notendur notast líklega við vefsíðuna þar sem smáforritið er ekki til fyrir þá vinsælu síma. Forritið er hins vegar til fyrir Android síma.

„Það að kyssa frændfólk sitt fyrir slysni er alvöru hætta á Íslandi. Til að komast hjá vandræðalegum atvikum bjuggu Íslendingar til smáforrit sem gerir notendum kleift að slá símum saman og smáforritið segir þeim síðan hvort þeir séu skyldir eða ekki,“ segir maðurinn í myndbandinu. „Þú gætir hugsað hvernig smáforritið veit hverjir eru skyldir. Notast er við gagnagrunn sem geymir upplýsingar um ættir þeirra um 1200 ár aftur í tímann.“

Margir Íslendingar hafa skrifað athugasemd við myndbandið og sagt að í raun nota fæstir þetta smáforrit. Hins vegar taka Íslendingarnir fram í athugasemdunum að margir notist við vefsíðuna Íslendingabók til að komast að því hverjum þeir eru skyldir og hverjum ekki.

@sherifelsahlyWhat do you think of this?🤔Follow For More!##sherifelsahly♬ Classical Music – Classical Music