OSigvaldi Kaldalóns, betur þekktur sem Svali mun flytja aftur til Íslands í sumar vegna COVID-19 Frá þessu greinir hann á Facebook síðu sinni.

Í lok árs 2017 greindi Svali frá því að hann myndi flytja til Tenerife ásamt fjölskyldu sinni. Þar hefur hann starfað sem leiðsögumaður í núna tvö ár.

„Svona miðað við þær fréttir sem eru í gangi hér á Spáni þá er ljóst að það verður minna að gera hjá okkur en maður var að vonast eftir og ætlum við því að koma heim í sumar og reyna að vinna eitthvað. Jóhanna snýr aftur á Unique og klippir eins og enginn sé morgundagurinn. Ég vona að ég geti farið að vinna aftur á Tenerife í haust.“

Svali er einn reynslumesti útvarpsmaður landsins, en hann hafði starfað í útvarpi frá sautján ára aldri, þangað til hann sagði upp starfi sínu á K100 og fór til Tenerife.

Svali segir að kollegi sinn muni sjá um ferðaþjónustuna í sumar, en hann muni sjálfur reyna að koma sterkur inn í haust. Hann segir raunveruleikann ansi snúin þessa stundina.

„Tenerife-Ferðir verða opnar og mun Ásgeir félagi minn sjá um vaktina í sumar, ef það verður eitthvað flogið hingað, en gerum svo ráð fyrir að hlutirnir rúlli af stað í rólegheitunum í haust. Skrítin staða en engu að síður raunveruleikinn.“