Miklar sviptingar hafa verið í veðbankaspám fyrir Eurovision-keppnina sem fer fram í maí í Rotterdam í Hollandi.

Fyrr í dag var íslenska framlaginu, Daða og Gagnamagninu með Think About Things, spáð þriðja sæti. Nú er Íslandi hins vegar spáð sigri í Eurovision.

Litháen er spáð öðru sæti, en framlagi þeirra On Fire með The Roop var lengi vel spáð sigri. Í þriðja sæti er síðan söngkonan Roxen frá Rúmeníu með lagið Alcohol You.

Það hefur líklega ekki farið framhjá neinum að Daði og Gagnamagnið hafa gert allt vitlaust víðs vegar um Evrópu með laginu Think About Things. Yfirleitt gefa veðbankaspár sem birtast á vefsíðunni Eurovision World rétta mynd af úrslitunum, en hins vegar er ekki búið að velja framlög allra landa og því geta þessa spár breyst mikið áður en kemur að stóru stundinni í maí.