Samfélagsmiðlastjarnan og söngkonan Camilla Rut Arnardóttir fagnaði 25 ára afmæli sínu á dögunum og fór í frí með eiginmanni sínum, Rafni Hlíðkvist, og syni þeirra, Gabríel. Ferðinni var heitið til Krítar, eins og þeir sem fylgja Camillu á samfélagsmiðlum vita.
Camilla er með tæplega 27 þúsund fylgjendur á Instagram og eins og sannri samfélagsmiðlastjörnu sæmir reynir hún að gera gagn og miðla fróðleik til fylgjenda sinna. Áhrifavaldar sofna ekki á verðinum í fríi og bauð Camilla fylgjendum sínum upp á frábært sparnaðarráð á Krít.
„Ef þið eruð að bóka ykkar hótel fyrir utanlandsferðir þá mæli ég með að senda tölvupóst á hótelið og biðja um besta verð sem viðkomandi getur boðið,“ skrifar Camilla í sögu sinni á Instagram. „Hótel henda oft á mann um tíu til fimmtán prósent afslætti fyrir vikið, sérstaklega ef maður er að bóka „off season“,“ bætir hún við. Hljómar sem afar einfalt ráð en rúsínan í pylsuendanum er sú að Camilla og Rafn spöruðu morðfjár með þessari aðferð.
„Þetta sparar okkur til dæmis sjötíu þúsund kall í þetta skiptið.“
Camilla hefur nokkra þekkingu á ferðamannabransanum og hefur unnið á bílaleigum í gegnum tíðina.
