Steinunn Ólína Þorsteinsdóttir leikkona minnist þess á Facebook að ár sé liðið síðan eiginmaður hennar, Stefán Karl Stefánsson, lést. Hún segir að sá dagur líði ekki þar sem hún hugsi ekki til hans.
„Í dag er liðið ár frá andláti Stefáns Karls. Sá dagur var okkur öllum erfiður en þó fylgdi honum líka einhver lausn því ekkert okkar vildi að Stefán myndi þjást frekar. Dauðinn er óútreiknanleg skepna. Það líður ekki sá dagur að ég hugsi ekki til elsku Stefáns og þannig er farið með marga í fjölskyldunni. Í minningunni lifir hann með okkur. Margs góðs er að minnast,“ skrifar Steinunn Ólína.
Hún segir að börn þeirra standi sig vel þrátt fyrir sorgina. „Börnin okkar standa furðu styrkum fótum, fyrir það er ég afar þakklát þótt ég geti vitanlega aldrei tekið frá þeim þann sársauka sem því fylgir að missa pabba sinn. Ekkert læknar slíkt að fullu, ekki einu sinni tíminn sem allt á að lækna. Við erum öll breyttar manneskjur og lítum lífið öðrum augum en áður. Í dag er mér efst í huga þakklæti til allra þeirra fjölmörgu sem hafa verið fjölskyldunni nálægir með einum eða öðrum hætti síðastliðið ár,“ skrifar Steinunn Ólína.
Hún segir að lokum að það eina sem skipti máli í lífinu sé að elska. „Án samvistar við annað fólk væri lífið harla lítils virði. Maður getur ekkert einn. Manni eru hinsvegar allir vegir færir ef manni auðnast í erfiðum aðstæðum að þiggja umhyggju og aðstoð annarra. Það hefur verið stærsta persónulega lexían. Ég endurtek það sem ég hef áður sagt: Að elska og vera elskaður er það eina sem skiptir máli. Allt annað er drasl.“
