Ásta Hrafnhildur Garðarsdóttir hefur verið lengi í sviðsljósinu, hún var reglulegur gestur á síðum Séð og Heyrt í áraraðir, þar til hún hóf störf þar sem blaðamaður og tók síðan við ritstjórastólnum degi eftir að Eiríki Jónssyni var sagt að yfirgefa hann.
Ásta fór nýjar leiðir þann tíma sem hún var ritstjóri og vöktu nokkur mál gríðarlega athygli og umtal. Eins og títt var sagðist enginn lesa Séð og Heyrt fyrr en eitthvað vakti umtal, þá kom í ljós að allir lásu blaðið. Ásta lék sér að því að vekja athygli á sér og blaðinu um leið.
Eftir að útgáfa Séð og Heyrt hætti hefur minna farið fyrir Ástu, hún hóf störf á Fréttablaðinu og sá einnig um þættina Ástir með Ástu á FM957. En núna er hún hætt í blaðamennskunni og flutt í sveitina þar sem hún nýtur sín til fulls.
„Ásta Hrafnhildur sterk og stolt, stuðla ég henni rímu. Er nú komin í Önundarholt ásamt kettinum Grímu,“ skrifar séra Hjálmar Jónsson ljóðrænt á Facebook-síðu Ástu.
Heyrst hefur að í sveitinni, nánar til tekið í Önundarholti, hafi Ásta líka fundið ástina í fangi Þorvaldar Steinþórssonar, sem er jafngamall og hún, árgerð ´71 og fyrrverandi nemandi í Garðaskóla eins og Ásta. Heimildarmaður DV segir parið geisla af hamingju og vita að þau eigi samleið í lífinu.
