Nanna Margrét Gunnlaugsdóttir, varaþingmaður Miðflokksins, mun taka sæti á Alþingi í dag í fjarveru Gunnars Braga Sveinssonar. Nanna Margrét er systir Sigmundar Davíðs Gunnlaugssonar, fyrrverandi forsætisráðherra og formanns Miðflokksins.
Í frétt RÚV í morgun kemur fram að Nanna Margrét hafi ekki tekið sæti á þingi áður og mun hún undirrita drengskaparheit að stjórnarskránni.
Fleiri dæmi eru um systkini samtímis á Alþingi. Þannig sátu Björn Bjarnason og Valgerður Bjarnadóttir samtímis á þingi. Björn var þingmaður Sjálfstæðisflokksins en Valgerður sat fyrir Samfylkinguna. Þá sátu Ingibjörg Pálmadóttir og Ísólfur Gylfi Pálmason samtímis fyrir Framsóknarflokk.
