Skiptar skoðanir eru um viðbrögð landsmanna, fyrirtækja og stofnana landsins við óveðrinu í dag. Helst kveður að gagnrýni á meint yfirdrifin viðbrögð við veðurspánni á höfuðborgarsvæðinu en allt bendir til að það fari betur út úr veðurhamnum en ýmis önnur svæði landsins, til dæmis Vestfirðir og Norðurland vestra.

Einn af þeim sem tjáir sig er Guðmundur Ingi Þóroddsson, veitingamaður í Árbæ og formaður Afstöðu – félags fanga.

Guðmundur skrifar eftirfarandi pistil um þetta á Facebook og vekur þar nokkrar umræður:

Ég er ekki að skilja hvað er í gangi yfir þessu veðri hjá þjóðinni.

Þegar ég var ungur (sem er ekki svo langt síðan) þá rauk maður út að leika sér tímunum saman án þess að hafa svo mikið sem meters skyggni. Svo þegar maður varð unglingur fór maður í björgunarsveit svo maður gæti leikið sér aðeins meira. Enginn kippti sér upp við þetta.

Nú er öllum vegum lokað, börnum kippt úr skólanum,viðvaranir gefnar út og Bónus lokað. Við erum að ala upp aumingja.

Þess skal getið að Guðmundur skreytir færslu sína með broskörlum sem gefur til kynna að hún sé ekki skrifuð í fúlustu alvöru.

Þess má geta að veitingastaður Guðmundar, Blásteinn, er opinn til kl. 22 í kvöld. Staðurinn við hliðina, Rakang Thai, sem Guðmundur rekur líka, er hins vegar lokaður.