Jakob Bjarnar Grétarsson, blaðamaður á Vísir.is, liggur sjaldnast á skoðunum sínum. Nýr pistill Jakobs um heiðurslausn listamanna hefur vakið mikla reiði hjá einhverjum af ástsælustu listamönnum þjóðarinnar. Tilefni pistilsins eru  þau tíðindi að dægurlagasöngvarinn Ragnar Bjarnason var í dag gerður að heiðurslaunahafa.

Jakob Bjarnar hefur lítið álit á fyrirkomulagi heiðurslaunanna og sparar ekki stóru orðin í þessum stutta pistli:

„Óvinsæla skoðun vikunnar. Þessi heiðurslaun listamanna eru alger sýra. Það verður bara að segjast. Upphaflega voru þetta flokkspólitísk hrossakaup. Svo notað til að stagbæta í velferðarkerfið. Hvorugt heldur vatni og nú er verið að setja vinsæla poppara á þetta til að slá ryki í augu fólks með góðum árangri. En pólitíkusar elska að sýna gæsku sína fyrir annarra manna pjéning. Þetta er mismunun. Heiðurslaunin eru ekki vond vegna þeirra sem eru á þeim heldur hinna sem ættu allt eins að vera þarna. Allt ætti þetta að blasa við en í landi meðvirkninnar er ekki hægt að vinda ofan af einu né neinu.“

Margir hneykslast á þessum orðum Jakobs og telja hann hafa farið illilega yfir strikið. „Hvaða rugl er þetta Jakob?“ skrifar Aðalheiður Ámundadóttir, blaðamaður á Fréttablaðinu, og bendir á að heiðurslaunin séu eftirlaun fyrir helstu listamenn þjóðarinnar sem eigi engan lífeyri.

Heiðurslaunahafinn Bubbi Morthens sendir Jakobi einfalda og stutta kveðju vegna pistilsins:

„Haltu kjafti“

Egill Helgason fjölmiðlamaður fagnar því að Ragnar hafi komist á heiðurslaun. Umræður um málið eru líflegar og þær má lesa með því að smella á tengilinn hér fyrir neðan.