Hallgrímur Helgason, Sigrún Eldjárn og höfundar Flóru Íslands hlutu Íslensku bókmenntaverðlaunanna í ár. Höfundar hvers verks um sig fá milljón íslenskra króna í verðlaunafé auk heiðursins.
Hallgrímur hefur verið tilnefndur fimm sinnum til verðlaunanna og hlaut þau árið 2001 fyrir Höfund Íslands.
Forseti Íslands, herra Guðni Th. Jóhannesson, afhenti verðlaunin 2018, fyrr í dag við hátíðlega athöfn á Bessastöðum. Verðlaunahöfum voru afhent skrautrituð verðlaunaskjöl og verðlaunagripir, sem Jón Snorri Sigurðsson á gullsmíðaverkstæði Jens hannaði; opin bók á granítstöpli með nafni verðlaunahöfundar og bókar hans.
Verðlaunin skiptast í þrjá flokka, sem eru:
Fræðirit og bækur almenns efnis
Hörður Kristinsson, Þóra Ellen Þórhallsdóttir og Jón Baldur Hlíðberg
Flóra Íslands -Blómplöntur og byrkingar
Útgefandi: Vaka Helgafell
Barna- og ungmennabækur
Sigrún Eldjárn
Silfurlykillinn
Útgefandi: Mál og menning
Fagurbókmenntir
Hallgrímur Helgason
Sextíu kíló af sólskini
Útgefandi: JPV útgáfa
Heiðar Ingi Svansson formaður Félags íslenskra bókaútgefenda, flutti ræðu, þar sem hann þakkaði stjórnvöldum mikið og vel fyrir lög sem gera ráð fyrir 400 milljóna stuðning við íslenska bókaútgáfu. Verðlaunahöfundar fluttu einnig ávörp og Regína Ósk og Svenni Þór fluttu tvö lög á milli dagskráratriða.
Fjögurra manna lokadómnefnd valdi verkin úr hópi fimmtán bóka sem tilnefndar voru til verðlaunanna í desember á síðasta ári þegar fimm bækur voru tilnefndar í hverjum flokki. Lokadómnefndina skipuðu Anna Þorbjörg Ingólfsdóttir, Steingrímur Þórðarson, Þórunn Sigurðardóttir og Gísli Sigurðsson sem var jafnframt var formaður nefndarinnar.
