Hljómsveitin Radiohead varð fyrir árás tölvuþrjóts í síðustu viku. Þetta kemur fram í tísti frá Johnny Greenwood, gítar- og hljómborðsleikara hljómsveitarinnar.
Brotist var inn á harða diskinn hjá söngvara hljómsveitarinnar, Thom Yorke. Diskurinn innihélt um 18 klukkutíma af efni sem var unnið í tengslum við plötuna OK Computer.
Tölvuþrjóturinn krafðist 150 þúsund dollara fyrir að gefa efnið ekki út en meðlimir Radiohead tóku málin í sínar eigin hendur.
Í stað þess að láta tölvuþrjótinn fá peninginn sem nemur um 19 milljónir í íslenskum krónum ákváðu þeir að gefa efnið sjálfir út.
Þeir gerðu allar upptökurnar aðgengilegar á streymiveitunni Bandcamp. Þar geta aðdáendur hljómsveitarinnar keypt plötuna og allur ágóðinn rennur síðan til hjálparsamtakana Extinction Rebellion.
