Í vikunni var greint frá því að saksóknari í Gautaborg í Svíþjóð hefði ákveðið að hefja rannsókn á máli Paolo Macchiarini skurðlæknis, sem fyrstur framkvæmdi plastbarkaaðgerð á mönnum. Málið verður rannsakað sem sakamál en eins og frægt er tengdist Tómas Guðbjartsson hjartaskurðlæknir málinu. Skjólstæðingur hans, Andemiram Beyene, var sá fyrsti sem lagðist undir hnífinn hjá Ítalanum.

Einnig hefur gustað um systur Tómasar, Ingibjörgu Guðbjartsdóttur, en þó með óbeinum hætti. Ingibjörg var á árum áður framkvæmdastjóri gjaldeyriseftirlits Seðlabanka Íslands og bar meðal annars ábyrgð á umfangsmikilli rannsókn sem beindist gegn meintum svikum Samherja. Bankinn beitti fyrirtækið stjórnvaldssekt en sú sekt var dæmd ógild í Hæstarétti á dögunum. Reiði forsvarsmanna Samherja hefur opinberlega beinst gegn Má Guðmundssyni seðlabankastjóra en bak við tjöldin eru þeir ekki síður ósáttir við framgöngu Ingibjargar í málinu.