Samfélagsmiðlastjörnur eru mikið í umræðunni þessa dagana og hvort að orðið „áhrifavaldur“ sé réttnefni á einstaklingum sem áberandi eru á samfélagsmiðlum á borð við Instagram og Snapchat.

Það er þó óumdeilt að Sunneva Einarsdóttir er með þeim vinsælustu á Instagram og Snapchat (sunnevaeinars), en þegar þetta er skrifað er hún með 36.500 fylgjendur á Instagram og þeim fer stöðugt fjölgandi.

Sunneva er sjötti gestur Einkalífsins á Vísi, en í þáttunum er rætt við fólk sem skarar fram úr á sínu sviði. Segir Sunneva að hún leggi gríðarlega mikla vinnu í hverja mynd sem hún birtir á Instagram.

Það fer mjög mikið eftir því hvort ég er að eiga góðan dag eða ekki. Ef hárið er í lagi eða make-upið en þetta getur tekið upp í tvo til þrjá tíma. Allt dæmið getur tekið langan tíma. Ef maður vill finna góða staðsetningu en flestallar myndirnar taka um eina klukkustund.

Segir Sunneva að hún fái aðstoð við myndatökurnar, oftast séu það vinkonur hennar eða litla systir hennar.

Annars er það bara sá sem er næstur mér. Ég sendi oft á vinkonur mínar og spyr bara hver sé laus. Ég á eina vinkonu sem er mikið í þessu og við förum oftast saman og hjálpumst að

Í þættinum ræðir Sunneva einnig um þegar hún hitti söngkonuna Jennifer Lopez, kvíðann sem fylgir því að vera svona stór persóna á samfélagsmiðlum hér á landi, um duldar auglýsingar og framtíðina á sviði samfélagsmiðla en Sunneva er í námi í viðskiptafræði við Háskóla Íslands.