Bardagakappinn Gunnar Nelson er besti bardagamaður okkar og þó víðar væri leitað. Hann undirbýr sig nú fyrir bardaga 8. desember í Toronto í Kanada, en þar mun hann berjast við Alex Olivera.

Gunnar er níundi gestur Einkalífsins á Vísi, en í þáttunum er rætt við fólk sem skarar fram úr á sínu sviði.

Gunnar fer yfir hvernig hefðbundinn dagur er hjá honum, vakna með syninum, sinna honum og stunda æfingar sem eru tvær á dag. „Það fer eftir hversu þungar æfingarnar eru,“ segir Gunnar um hvort þær eru ein eða tvær.

„Ég reyni að borða eins hollt og ég get, en þarf ekki að hafa áhyggjur af vigtinni,“ segir Gunnar. Hann segist borða kolvetni helst eftir æfingu, og fókusera meira á kjöt, prótein- og fituríkan mat.

Tölvuleikir, krossarar og vélsleðar, vinir og fjölskylda eru meðal helstu áhugamála Gunnars, fyrir utan MMA. Gunnar keypti gamalt hús á Ólafsfirði með nokkrum félögum sínum og eru þeir að gera það upp, auk þess sem Gunnari finnst „hrikalega gaman að sleðast og hjóla þarna, borða góðan mat og slaka á.“ Húsið heitir Hringver og keyptu þeir það af Ungmennafélaginu, segir Gunnar húsið svolítið þekkt hús þarna fyrir norðan.

„Þetta er harðgert sport og tilgangurinn er að yfirbuga andstæðinginn og þar ertu að nota högg og tök og þetta getur orðið blóðugt,“ segir Gunnar, „og það er miklu meira að fara fyrir brjóstið á fólki en hvað þetta er hættulegt. Þetta er ekki svakalega hættulegt sport miðað við jaðaríþróttir, en það er alls ekki hættulaust.“ Bætir hann við að umræðan á til að fara út í vitleysu, en um sé að ræða þrautþjálfaða menn sem vita út í hvað þeir eru að fara, með heilt teymi með sér og reglur.

„Þegar sambönd ganga upp gefa þau svo miklu meira,“ segir Gunnar og segist hafa smollið strax saman við kærustu sína , Fransisku Björk Hinriksdóttur, g að hún sé rétta konan fyrir hann.

Í þættinum ræðir Gunnar um föðurhlutverkið, ástina í lífi sínu, hættuna sem fylgir því að vera í MMA, um tölvuleikjaáhugann, um skaðsemina af þeim mikla niðurskurði sem bardagamenn fara í fyrir bardaga, um djammið, vináttu hans við Conor McGregor og Nandos-fíknina.

Viðtalið við Gunnar má hlusta á í heild sinni á Vísi.