Trouble in Tahiti er djössuð ópera og háðsádeiluverk eftir tónskáldið Leonard Bernstein.

Verkið afhjúpar tálsýn ameríska draumsins, heim samanburðar og neyslukapphlaups sem ástin líður fyrir. Þetta er í fyrsta sinn sem verkið er sett upp á Íslandi en Bernstein hefði orðið 100 ára á árinu. Óperan er frumsýnd í Tjarnarbíó sunnudaginn 28. október kl. 20.30.

Sam og Dinah eru fyrirmyndarhjón sem búa í hinni fullkomnu úthverfaparadís. Undir fægðu yfirborðinu leynist þó veruleiki sem er á skjön við markaðsvædda ímyndina. Við fylgjumst með einum degi í lífi þeirra og tvísýnni atburðarás um framtíð hjónabandsins.

Óperan er tæp klukkustund að lengd og verður flutt á ensku.

Trouble in Tahiti er liður í hátíðardagskrá Óperudaga í Reykjavík 2018 sem fram fer víðs vegar um borgina frá 20. október – 4. nóvember. Óperudagar í Reykjavík er spennandi hátíð þar sem boðið er upp á óperusýningar og fjölbreytta söngviðburði. Tónlistarleikhús fær að flæða inn í króka og kima höfuðborgarinnar.

Tónlistarstjóri: Gísli Jóhann Grétarsson Leikstjóri: Pálína Jónsdóttir Aðalhlutverk: Aron Axel Cortes og Ása Fanney Gestsdóttir Jazztríó: Íris Björk Gunnarsdóttir, Gunnar Guðni Harðarson og Ragnar Pétur Jóhannsson Hljómsveit: Hrönn Þráinsdóttir, Símon Karl Sigurðarson Melsteð, Þórður Hallgrímsson, Sigríður Hjördís, Örvar Erling Árnason, Aurora Erika Luciano og Ásthildur Helga Jónsdóttir Leikmynd og búningar: Þórdís Erla Zoega Danshöfundur: Auður Bergdís Snorradóttir Myndvinnsla: Ásta Jónína Arnardóttir Lýsing: Hafliði Emil Barðason Framkvæmdastjórn: Guja Sandholt og Ása Fanney Gestsdóttir Sýningarstjórn: Tinna Þorvalds Önnudóttir Styrktaraðilar: Reykjavíkurborg, Tónlistarsjóður og Norræni menningarsjóðurinn