Poppsálin er poppmenningarlegt hlaðvarp með sálfræðilegu ívafi. Fjallað er um ýmis sálfræðileg málefni sem tengjast poppmenningu sem og áhugaverðar rannsóknir og pælingar innan sálfræðinnar.

Elva Björk Ágústsdóttir, sálfræðikennari og umsjónarkona Poppsálarinnar skrifar:

Um daginn barst póstur frá skóla sonar míns þar sem varað var við karlmanni sem var að klæmast við börnin í gegnum Snapchat. Á samfélagsmiðlinum kallaði hann sig Karl Jónsson en hafði áður notað önnur algeng karlmannsnöfn eins og Magnús. 

Foreldrarnir tóku málin í sínar hendur, þóttust vera börn á Snapchat og biðu eftir að hann léti til skara skríða. Karl, eða Magnús, var ekki lengi að bíta á agnið og fór að senda foreldrum ógeðsleg kynferðisleg skilaboð og myndir.  Hér meðfylgjandi eru skjáskot af samtölum mannsins.

Stuttu síðast bárust þær fréttir að búið væri að handtaka manninn. Þetta var enginn annar en fyrrum rannsóknarlögreglumaðurinn Hörður Sigurjónsson. Þekktur barnaníðingur sem náðist á upptöku fyrir mörgum árum í fréttaskýringaþættinum Kompás, þar sem hann var að reyna að tæla til sín 13 ára tálbeitu þáttarins. 

Hörður Sigurjónsson hefur stundað það í mörg ár að reyna að lokka til sín unga krakka. Finna má um hann ótal fréttir þar sem sagt er frá handtöku hans og að hann gangi síðan laus nokkrum dögum síðar. 

Lítið virðist vera hægt að gera til að stöðva þennan mann. Þann 9. desember síðastliðinn var Hörður úrskurðaður í fjögurra vikna gæsluvarðhald vegna gruns um fjölmörg brot gegn börnum. 

Í nýjasta þætti Poppsálarinnar er fjallað um barnaníðinga og menn með barnagirnd líkt og Hörð. 

Farið er í það sem einkennir barnaníðinga. Einnig er rætt um barnagirnd annars vegar og barnaníðinga hins vegar og hvort hægt sé að grípa inn í og koma í veg fyrir það að einstaklingar með barnagirnd brjóti á börnum og gerist barnaníðingar. 

Hægt er að nálgast þáttinn hér: