Af öllum oddvitum í borginni er Eyþór Arnalds, borgarstjóraefni Sjálfstæðisflokksins, minnst hrifinn af því að opna stjórnsýsluna og bókhald borgarinnar. Samkvæmt kosningaprófi RÚV, sem allir oddvitar í borginni og víðar tóku þátt í, er Eyþór aðeins 18% fylgjandi því að opna stjórnsýsluna. Allir aðrir oddvitar, nema Vigdís Hauksdóttir í Miðflokknum og Þórdís Lóa Þórhallsdóttir í Viðreisn, vilja 100% opna stjórnsýsluna. Er Vigdís 80% fylgjandi því og Þórdís Lóa 92%. Hildur Björnsdóttir, sem skipar annað sætið á lista Sjálfstæðisflokksins, er einnig 100% fylgjandi því að opna stjórnsýsluna eins mikið og hægt er. Þetta vekur óneitanlega spurninguna, misskildi Eyþór spurninguna eða ætlar hann sem borgarstjóri að fela eitthvað?