Orðið á götunni er að jarðarfararstemning sé nú í Valhöll við Háaleitisbraut. Ný skoðanakönnun Maskínu sem framkvæmd fyrir DV sýnir að fylgi flokksins í Reykjavíkurborg hefur hrapað á skömmum tíma og er Samfylkingin nú langstærsti flokkurinn í borginni. Fylgisaukning sem mældist í síðustu könnun er gufuð upp og tapar flokkurinn 6,3 prósentustigum milli kannana, mælist með 25,5 prósent.
Ekki er ástandið betra í Framsókn sem tapar enn fylgi í borginni og mælist nú með 3,8 prósent. Flokkurinn myndi rétt ná einum borgarfulltrúa en í síðustu kosningum fékk Framsókn tæplega 19 prósent, fjóra fulltrúa og komst í meirihluta. Eftirminnilegt er hvernig Einar Þorsteinsson, oddviti Framsóknar í borginni, plottaði yfir sig og sjálfan sig úr borgarstjórastólnum fyrr á þessu ári.
Samfylkingin fær tæp 30 prósent í könnuninni og myndi bæta við sig þremur borgarfulltrúum. Viðreisn eykur enn fylgi sitt, mælist nú með ríflega 12 prósent og fengi þrjá borgarfulltrúa, myndi bæta við sig tveimur.
Orðið á götunni er að skýringuna á þessum fylgishrapi Sjálfstæðisflokks og Framsóknar og fylgisaukningu Samfylkingar og Viðreisnar sé ekki að finna í fundarsal borgarstjórnar heldur í öðrum fundarsal þar spölkorn frá, þingsal Alþingis þar sem þingmenn stjórnarandstöðunnar hafa beitt langdregnu og tilgangslausu málþófi gegn vinsælu máli ríkisstjórnarinnar um að leiðrétta veiðigjöld.
Lítið hefur verið að frétta úr ráðhúsinu undanfarnar vikur á sama tíma og kjósendur hafa fylgst agndofa með þingmönnum stjórnarandstöðunnar fótumtroða lýðræðið í landinu með málþófi sem gengur fram af jafnvel þolinmóðasta fólki.
Orðið á götunni er að fari málþófinu ekki senn að linna í þingsal séu litlar líkur á að það sjái fyrir endann á fylgishruni Sjálfstæðisflokksins í Reykjavík.
Auk mikils fylgistaps Sjálfstæðisflokksins er athyglisvert að meirihlutinn í Reykjavík heldur velli samkvæmt könnuninni. Píratar og Sósíalistar tapa samtals þremur fulltrúum en Samfylkingin bætir við sig þremur og því er meirihlutinn áfram með 12 af 23 borgarfulltrúum. Raunar eru niðurstöður könnunarinnar á þann veg að hægt yrði að mynda sama meirihluta í borginni og nú er á Alþingi með því að skipta út Pírötum, VG og Sósíalistum og taka inn Viðreisn.
Orðið á götunni er að mjög verði á brattann að sækja hjá Sjálfstæðisflokknum í borgarstjórnarkosningunum í maí á næsta ári jafnvel þótt takist að koma vitinu fyrir þingmenn flokksins sem nú tala af honum fylgið eins og enginn sé morgundagurinn. Ástandið í borgarstjórnarflokknum er nefnilega ekki beysið, hópurinn þríklofinn og oddvitinn á berangri. Fátt bendir til annars en að eyðimerkurganga Sjálfstæðismanna í höfuðborginni lengist enn.
