Bíræfni eða ósvífni? Þorgerður Katrín Gunnarsdóttir utanríkisráðherra er ekki viss hvort eigi við um Sigurð Inga Jóhannsson, formann Framsóknarflokksins.
Sigurður beindi fyrirspurn til Þorgerðar í undirbúnum fyrirspurnartíma á Alþingi í dag. Þar lét hann að því liggja að Viðreisn sem og aðrir ríkisstjórnarflokkar hafi skipt talsvert um skoðun í einstaka málum síðan þeir mynduðu ríkisstjórn. Svo sem hvað varðar Íslandsbanka, Íbúðalánasjóð og annað. Steininn hafi þó tekið úr þegar þingmaður Framsóknar, Ingibjörg Isaksen, kom með breytingatillögu við frumvarp heilbrigðisráðherra um ýmsar breytingar á lögum um sjúkratryggingar. Ingibjörg hafi lagt til að áður en greiðsluþátttaka vegna meðferðar erlendis sé samþykkt skuli ganga úr skugga um að sambærileg meðferð sé ekki í boði hér á landi hjá einkaaðila.
Sigurður segir að hér sé um að ræða breytingatillögu sem sé sambærileg tillögu sem Þorgerður Katrín hafi sjálf flutt í þinginu, og það ítrekað. Engu að síður hafi þingmenn Viðreisnar kosið gegn tillögu Ingibjargar. „Hvernig er hægt að vera á móti eigin máli,“ spurði Sigurður. „Hvaða hagsmunir eru eiginlega mikilvægari en skynsamleg nýting fjármuna ríkisins og hagsmunir sjúklinga?“
Þorgerður Katrín svaraði og sagði stefnu Viðreisnar í þeim málum sem Sigurður nefndi óbreytta. Það þurfi þó að greina málin og hafi það komið Þorgerði á óvart hversu lítið af greiningum lág fyrir þegar þessi ríkisstjórn tók við völdum. „Það er sama í hvaða ráðuneyti við komum í, hvort sem það er heilbrigðisráðuneyti eða dómsmálaráðuneyti eða hvað það er, það vantar grunngögn í stórum málum þar sem ég hélt að síðasta ríkisstjórn hefði verið með augun á boltanum.“
Aftur steig Sigurður upp í pontu og ítrekaði þá afstöðu sína að ríkisstjórnarflokkarnir hafi skipt um skoðun. Til dæmis hvað varðar breytingartillögu Ingibjargar.
Þá kom nokkuð á Þorgerði sem velti því fyrir sér hvort Sigurði væri alvara með þessu.
„Virðulegi forseti. Ég veit ekki hvort þetta er bíræfni eða ósvífni af hálfu formanns Framsóknarflokksins sem var í sjö ár í ríkisstjórn sem felldi einmitt þessar tillögur á síðasta ári.“
Þorgerður rekur að hún sé enn með sömu afstöðu hvað málið varðar en hafi nú áttað sig á því að það vantar frekari gögn. Málið er nú til skoðunar og stefnan er að sjálfsögðu að aðgerðir á borð við liðskipti geti farið fram hér heima, sem og efnaskiptaaðgerðir og annað.
„En bíræfnin er ótrúleg. Hér var samþykkt dellufrumvarp gegn neytendum á síðasta kjörtímabili, undir lok kjörtímabils. Engin gögn lögð fram, handarbakavinna. Á ég að tala um ÍL-málið? Ekki klárað. Þessi ríkisstjórn er búin að klára það. Eigum við að tala um Íslandsbanka? Síðasta ríkisstjórn var með allt niður um sig þar. Þessi ríkisstjórn er búin að klára það og ekki á sex mánuðum. Við munum klára þetta með sóma þannig að það verði fókus á þjónustuna við einstaklingana sem þurfa á henni að halda og það verður ekki aðalatriðið hver veitir þjónustuna heldur að tryggja þjónustuna og hagkvæmni í ríkisrekstri líka.
Og vel að merkja: Við ætlum að skila hallalausum fjárlögum eigi síðar en 2027. Það er eitthvað allt annað en síðasta ríkisstjórn gerði.“
