Ríkisstjórn Bjarna Benediktssonar var mynduð þrátt fyrir að 78 prósent landsmanna væru henni andvíg og 45 þúsund manns skrifuðu undir undirskriftalista gegn Bjarna. Steinunn Ólína Þorsteinsdóttir segir þingið varla afbera þessa ríkisstjórn og bendir á að forseti sé verndari þingræðisins og hans hlutverk sé að koma saman ríkisstjórn sem þingið getur afborið. Steinunn Ólína er gestur Ólafs Arnarsonar í sjónvarpsþætti á Eyjunni í aðdraganda forsetakosninga. Þátturinn er aðgengilegur hér á Eyjunni, á hringbraut.is og á Hringbrautarrás Sjónvarps Símans. Einnig er hægt að hlusta á hann sem hlaðvarp.

Hér má sjá brot úr þættinum:

Eyjan - Steinunn Ólína - 1.mp4

„Þegar við göngum til kosninga þá erum við að treysta fólki til þess að vinna fyrir okkur. Það er jú þingið sem á alltaf að vera að vinna að hagsmunum fólksins í landinu og þegar svona auðsýnt er að það er ekki það sem er að raungerast, þvert á kosningaloforð hefur mér fundist þingið ekki, eða ríkisstjórnin vegna þess að þingið, það er nú forsetinn sem á að verja þingræðið og það þýðir í raun og veru að hann þarf að koma saman ríkisstjórn sem þingið getur afborið,“ segir Steinunn Ólína.

Hér má sjá þáttinn í heild:

Steinunn Ólína Þorsteinsdóttir

„Þingið á svolítið erfitt með að afbera þessa ríkisstjórn og við höfum séð það, stjórnarandstaðan hefur tjáð sig mjög ríkulega um þau mál …“

En hún er náttúrlega minnihluti.

„Að sjálfsögðu er hún minnihluti, en við skulum ekki gleyma því að 78 prósent landsmanna voru andvíg þessari glænýju ríkisstjórn og tæplega 45 þúsund manns skrifuðu undir undirskriftalista Bjarna Benediktssyni til höfuðs. Á þetta var nú ekki mikið hlustað og stjórnin var mynduð engu að síður en maður heyrir það bara í samfélaginu að fólki finnst ekki að á það sé hlustað.“