„Enn og aftur sýnir Bjarni Ben hversu öflugur stjórnmálamaður hann er. Hann sá sóknarfæri fyrir flokkinn og nýtti það. Sóknarfærið er fólgið í því að stíga út úr ráðuneytinu þar sem hann hefði ekki fengið neinn frið fyrir hælbítum. Samhliða fær flokkurinn tækifæri til að safna kröftum sínum og kjarna sig,“ segir Elliði í færslu á Facebook.
„Þetta gerir hann af virðingu og auðmýkt. Svo ósammála sem hann er umboðsmanni þá virðir hann afstöðu hans,“ segir hann á Facebook.
Hann segir að óhjákvæmilega muni pressan á Svandísi Svavarsdóttur matvælaráðherra aukast samhliða þessari ákvörðun Bjarna. Segir hann að ólíkt Bjarna hafi hún brotið lög.
„Vart hyggst hún reyna að sitja það af sér eftir þetta útspil.“
Elliði segist telja best að samhliða þessu yrði gerð meiri breyting en minni á ríkisstjórninni.
„Færa ráðherra á milli ráðuneyta og koma flokkunum þannig upp úr skotgröfunum sem þeir sannarlega eru í. Draga línu í sandinn og hefja seinni hálfleik með því að taka dagskrárvaldið í dægurmálunum. Þannig gæti ríkisstjórn verið á vetur setjandi.“