Í kjölfar jarðhræringa og eldgosa á Reykjanesskaga hefur þeim röddum fjölgað sem telja allt annað en skynsamlegt að búa til flugvöll í Hvassahrauni. Katrín Jakobsdóttir, forsætisráðherra, og Sigurður Ingi Jóhannsson, innviðaráðherra, hafa sagt að minni líkur hljóti að vera á að flugvöllur verði gerður þar í kjölfar eldgosanna. Dagur B. Eggertsson, borgarstjóri, og Einar Þorsteinsson, formaður borgarráðs, vilja þó ekki afskrifa Hvassahraun að sinni.

Morgunblaðið skýrir frá þessu í dag. „Ég held að það eigi að fara mjög varlega í að dæma Reykjanesið í heild sinni úr leik. Það er skynsamlegt að klára þær athuganir sem standa yfir í Hvassahrauni. Veðurstofan, sem er að rannsaka Hvassahraunið, er með náttúruvá og eldvirkni til skoðunar,“ sagði Dagur þegar hann var spurður hvort gerð flugvallar í Hvassahrauni væri orðin ólíklegri vegna eldgosanna.

Hann var þarna að vísa til rannsóknar Veðurstofunnar sem er að gera áhættumat um þessar mundir en niðurstaða þess mun liggja fyrir í haust.

Einar tók undir orð Dags og sagði eðlilegast að bíða eftir niðurstöðum Veðurstofunnar. „Ég held að allir ættu bara að anda í kviðinn. Það er best að byggja þetta allt saman á gögnum frekar en tilfinningu,“ sagði hann.

Dagur sagði ótímabært að skoða aðra kosti að sinni en Einar sagði að það geti verið skynsamlegt að skoða aðra kosti sem fyrst.