Oddný Assa Jóhannsdóttir hefur verið ráðin forstöðumaður reikningshalds hjá PLAY. Hjá PLAY leiðir hún deild reikningshalds og er hluti af stjórnendateymi fjármálasviðs. Þá ber hún ábyrgð á daglegum rekstri reikningshalds og uppgjörum PLAY. Auk þess tekur Oddný þátt í mótun stefnu og framtíðarsýnar fjármálasviðs PLAY. Oddný hóf störf hjá PLAY í September samkvæmt tilkynningu frá fyrirtækinu.
Til PLAY kom Oddný frá KPMG þar sem hún starfaði frá 2010, fyrst sem sérfræðingur á endurskoðunarsviði og svo sem endurskoðandi og verkefnastjóri.
Oddný er með BSc í fjármálaverkfræði frá Háskólanum í Reykjavík og meistaragráðu í reikningsskilum og endurskoðun frá Háskóla Íslands. Þá er hún löggiltur endurskoðandi.
“Oddný er reyndur endurskoðandi með mjög víðtæka þekkingu á sviði fjármála- og endurskoðunar. Við erum gríðarlega ánægð með að hún sé orðin partur af PLAY liðinu enda mun hún hjálpa okkur við að byggja upp flott félag til framtíðar,” segir Þóra Eggertsdóttir, fjármálastjóri PLAY.
