„Í ljósi þess að núna hafa greinst 330 manns með COVID 19 hér á landi þá er ég aðeins að klóra mér í hausnum yfir því sem sóttvarnarlæknir sagði á blaðamannafundi 26. febrúar en hann sagði að verstu sviðsmyndir væru að um 300 manns myndu smitast hér á landi,“

segir Vilhjálmur Birgisson, formaður Verkalýðsfélags Akraness og varaforseti ASÍ á Facebook í dag.

Hann vill að fjölmiðlar spyrji sóttvarnarlækni og landlækni gagnrýnna spurninga, en tekur fram að hann hafi ekki sérfræðiþekkingu á málefninu:

„Tek það skýrt fram að ég hef eðli málsins samkvæmt ekkert vit á þessu, en mér finnst eðlilegt að fjölmiðlar spyrji þetta ágæta fólk einnig gagnrýnna spurninga, því nú hefur sagan sýnt okkur að versta sviðmynd sem landlæknir teiknaði upp 26. febrúar stenst ekki nokkra skoðun. Ég vil einnig taka skýrt fram að ég er ekki í nokkrum vafa um að þetta ágæta fólk er að gera sitt besta, en spurning, erum við að gera nóg!?“

Samkvæmt landlækni er talið að kórónaveirusmit nái hámarki í kringum 10. apríl.

Sjá einnig: Yfirlæknir spáir nærri þreföldun smita um næstu mánaðamót – „Við verðum í sameiningu að ná að stöðva þennan faraldur“