„Eftirfarandi er sett fram til fróðleiks með fyrirvara um að þar er eingöngu verið með stærðfræðilegum aðferðum að reyna rýna í mögulegan fjölda smita næstu tvær vikur miðað við fjölda smita frá 28. febrúar til 17. mars. Eingöngu er um stærðfræðilega spá að ræða. Vonandi nær samkomubannið að draga úr aukningu smita,“

skrifar Jón Magnús Kristjánsson, yfirlæknir á bráðamóttöku Landspítalans í Fossvogi á Facebook og Morgunblaðið greinir frá.

Hann birtir tvö súlurit með spá sinni um fjölda kórónuveirusmita þar sem hann gerir ráð fyrir alls 701 smitum hér á landi þann 1. apríl næstkomandi, eftir 13 daga.

Staðfest smit í dag eru 250 samkvæmt covid.is og því um 180% aukningu smita að ræða á 13 dögum.

Uppfært – 11.25

Smitum hefur þegar fjölgað um 80 síðan í gær og eru nú 330 þegar þetta er skrifað klukkan 11.25.

Samkvæmt landlækni er talið að kórónaveirusmit nái hámarki í kringum 10. apríl

Nauðsynleg tölfræði

Jón segir nauðsynlegt að hafa slíka tölfræði til hliðsjónar undirbúnings:

„Tilgangurinn er að hafa einhvern grunn til þess að áætla hvernig við getum þurft að undirbúa okkur. Ég hvet því alla til að fara að öllu eftir tilmælum sóttvarnarlæknis. Við verðum í sameiningu að ná að stöðva þennan faraldur,“

segir Jón.

Fyrri myndin sýnir þróun nýrra smita og heildarfjölda smita frá 28/2 til 17/3 samkvæmt tölum á covid.is. Seinni myndin sínir spána næstu tvær vikur ef við náum ekki að hemja smitin. Samkvæmt henni verða komin 701 smit 1. apríl segir Jón.

Hann segir að nauðsynlegt sé að týna til slíkar staðreyndir svo hægt sé að undirbúa sig það sem koma skal:

„Ég held við séum öll meira eða minna hrædd við CoViD faraldurinn þessa dagana, sum okkar vegna okkar eigin heilsu, sum vegna aðstandenda í áhættu hóp og enn aðrir vegna stöðu heilbrigðiskerfisins og þjóðfélagsins alls. Langflestir fylgja ráðleggingum sóttvarnarlæknis og reyna eftir bestu getu að forðast smit. Á sama tíma fáum við sífelldar fréttir og lýsingar frá öðrum löndum um skelfilegar afleiðingar faraldursins. Við þurfum að taka til okkar staðreyndir og undirbúa okkur fyrir það sem er framundan á sama tíma og við verðum að reyna að halda áfram með okkar líf,“

skrifar Jón.