Brynjar Níelsson, þingmaður Sjálfstæðisflokksins, sakar Pírata um popúlíska aðferðafræði og undrast að Evrópuþingið hafi ekki fordæmt framgöngu Þórhildar Sunnu Ævarsdóttur, þingmanns Pírata, sem einnig gegnir formennsku í nefnd Evrópuráðsins, í færslu á Facebook í dag:
„Þegar fylgi fer niður í skoðanakönnunum hjá Pírötum er strax farið í herferð með ásökunum um óheiðarleika, spillingu og siðleysi annarra. Þetta er alþekkt aðferð popúlískra flokka. Kom því ekki á óvart þegar breska stórblaðið Guardian flokkaði íslenska pírataflokkinn sem popúlistaflokk. Þar er auðvitað fremstur í flokki sá þingmaður Pírata sem hefur fengið áfellisdóm vegna brots á siðareglum Alþingis.
Einkennilegt er að Evrópuráðsþingið, sem er sérstaklega annt um siðlega háttsemi og hefur þvingað þjóðþingin til að setja siðareglur, skuli ekki sjá neitt athugavert við að þessi sami þingmaður skuli gegna formennsku í einni af mikilvægustu nefndum þings Evrópuráðsins. Ekki svo að það komi mér á óvart enda þarna rekin grímulaus pólitík þar sem þekking á mannréttindum og siðferðislegum málefnum er mjög takmörkuð, þótt engin skortur sé á sjálfskipuðum sérfræðingum í þeim efnum. En við höldum sjálfsagt áfram að trúa því að allt sem þaðan kemur sé heilagur sannleikur.“
Þórhildur Sunna situr í jafnréttisnefnd og laga- og mannréttindanefnd Evrópuráðsþingsins, en aðrir fulltrúar Alþingis eru Rósa Björk Brynjólfsdóttir VG og Bergþór Ólason, Miðflokki.
