Reykjanesbær er eitt skuldugasta sveitarfélag landsins, en skuldir þess námu um 45 milljörðum í fyrra. Við bætist gjaldþrot WOW air sem mun auka vanda sveitarfélagsins. Kjarninn greinir frá því að samkvæmt þeirra heimildum muni Reykjanesbær fá um fjóra milljarða króna í sinn hlut af kaupverði Jarðvarma í ORK-hlut HS Orku frá því í byrjun apríl, en kaupverðið nam um 8.8 milljörðum króna. Jarðvarmi er í eigu 14 íslenskra lífeyrissjóða.
Reykjanesbær eignaðist skuldabréf er það seldi hlut sinn í HS Orku til Geysis Green Energy, en það skuldabréf var selt í ágúst 2012. Var það ORK-fjárfestingarsjóðurinn sem keypti skuldabréfið og söluverðið sagt vera 6.3 milljarðar. Hinsvegar var sú tala bundin ýmsum skilyrðum og var verðmætið metið á 5.8 milljarða í lok árs 2014, auk þess sem ORK þurfti að fá afstöðu Reykjanesbæjar ef það ætlaði að ganga að tilboðum í það.
Nánar er fjallað um málið á Kjarnanum.