Þátttaka Íslands á HM í Rússlandi hafði áberandi áhrif á bílaumferð í Reykjavík á meðan á leikjum landsliðsins stóð, samkvæmt tilkynningu frá Reykjavíkurb0rg.  Skrifstofa samgöngustjóra og borgarhönnunar hefur umsjón með TASS skynjurum, sem telja bíla á Hringbraut við Njarðargötu.

Venjulega fara um 1.800 bifreiðar á klukkustund á laugardögum austur eftir Hringbraut við Njarðargötu en það gerðu aðeins 200 bílar á meðan leik Íslands og Argentínu stóð milli klukkan tólf og þrjú þann 16. júní sl.

Föstudaginn 22. júní áttust Nígería og Ísland við á vellinum og um leið og leikurinn hófst klukkan þrjú dró verulega úr umferð. Venjulega aka þar um 2.000 bifreiðar á klukkustund en talan féll niður í 400 bíla. Umferðartoppur sem iðulega er í kringum fjögur á föstudögum varð að þessu sinni fyrir leik.

Þriðjudaginn 26. júní keppti svo Ísland við Króatíu og áhrifin leyndu sér ekki því umferðartoppur sem oftast er síðdegis varð ekki fyrr en eftir leik um kvöldið. Fram kemur að margir hafi verið í bænum að horfa á leikinn, í vinnunni, utandyra, í bíóum og á veitingastöðum. Fjöldi bíla datt úr 1.350 á klukkustund í 250 á meðan á leiknum stóð þennan dag.

Mælingar á góðviðrisdeginum í Reykjavík

Miðvikudaginn 13. júní var sérlega gott verður í Reykjavík, heiður himinn og blíða. Þetta hafði áhrif á hegðun borgarbúa og það kom fram á reiðhjólaumferðamælum. Í Nauthólsvík mældust 1.825 reiðhjól á stígnum en daginn eftir þegar veðrið hafði breyst aftur hjóluðu aðeins 514 þennan stíg.

Blíðviðrið hafði einnig áhrif á heimsóknir í Grasagarðinn en 13. júní fóru 1.560 inn í hann en aðeins 318 daginn eftir.

Veðrið hefur mikil áhrif og það er ekki nema von að það sé algengt umræðuefni meðal fólks.