Áhrifamikil tyrknesk trúarsamtök í Hollandi, sem upp á ensku nefnast The Turkish Islamic Cultural Federation og hafa innan sinna vébanda 144 moskur í Hollandi, hafa krafist þess að samfélagsmiðillinn Twitter setji formann hollenska Frelsisflokksins, Geert Wilders, í bann frá miðlinum.
Frelsisflokkurinn er nú næststærsti stjórnmálaflokkur Hollands, með 20 þingsæti, en er þó einangraður á þingi því engir aðrir stjórnmálaflokkar í landinu vilja vinna með honum. Hefur flokkurinn gert út á andúð gegn innflytjendum og harða gagnrýni á Íslam.
Í bréfi til Twitter segja samtökin meðal annars að Wilders hafi sært 1,2 milljónir múslíma í Hollandi með ummælum sínum. Meðal þeirra ummæla eru staðhæfingar á borð við þær að Múhameð spámaður hafi verið barnaníðingur og fjöldamorðingi og að böl á borð við hatur á samkynhneigðum, ill meðferð á dýrum, þrældómur og óréttlæti fylgi Íslam.
Þekkt fordæmi eru fyrir því að andstæðingar Íslams hafi verið bannaðir á Twitter. Hinn þekkti og umdeildi Íslamsgagnrýnandi, Tommy Robinson, fékk ævilangt bann frá Twitter fyrr á árinu. Það var þó fyrir öllu hófsamari ummæli en Geert Wilders hefur látið hafa eftir sér, nefnilega að 90% gerenda í barnaníðsmálum götugengja (svokölluð grooming gangs) séu íslamskir. Byggði hann yfirlýsingu sína þó á gögnum frá samtökum hófsamra múslíma í Bretlandi, The Quilliam Foundation (og skeikaði raunar um 4% – talan var 86%).
